د کابل ښاروالۍ له لوري د استملاکي ملکیتونو او نورو خنډونو تر پاکولو وروسته، د دیارلسمې ناحیې اړوند له امید سبز ښارګوتي څخه تر عرفاني سړک او بیا تر قلعه قاضي پورې د نوي نښلوونکي سړک د جوړولو لومړنۍ چارې پیل شوې. د دیارلسمې ناحیې رئیس مولوي عبدالصمد عابد وویل: د یاد سړکونو پر وړاندې د خنډونو د پاکولو په چارو کې د یادې ناحیې اوسېدونکو له کابل ښاروالۍ سره مرسته کړې ده چې، د دوی له دې کار څخه د کابل ښاروالۍ مشرتابه مننه کوي. نوموړي زیاته کړه چې، د دې سړکونو په جوړېدو سره به د کابل لوېدیځې برخې اقتصادي ودې ته زمینه برابره او ورسره جوخت به ښاریانو ته د تګ راتګ په برخه کې ګڼې آسانتیاوې رامنخته شي. له امید سبز ښارګوټي څخه تر عرفاني سړک پورې سړک، ۳۸۳۴ متره اوږدالی او ۴۵متره سور او پر دوام یې د قلعه قاضي تر حلقوي سړک پورې سړک، ۱۱۴۶ متره اوږدوالی او ۲۰ متره سور لري چې، چارې به یې د ۱۸ میاشتو په موده کې په بنسټیزه توګه بشپړې شي.