د کابل ښاروالۍ له لوري د اوولسمې او پنځمې ناحیې اړوند له ذاکرین ښارګوټي څخه تر قرغې سړک پورې د کابل شمال- لوېدیځ نښلوونکي سړک د دویمې لیکې قیرچارې پیل شوې. د کابل ښاروالۍ د کار ساتنې او مراقبت ریاست د سړک جوړونې آمر انجنیر محمد داود ځواب وویل: دا سړک ۷۶۴۵ متره اوږدوالی او په دوه لیکو کې ۳۰ متره سور لري چې، په بنسټیزه توګه د جوړېدو په حال کې دی. نوموړي زیاته کړه: د یاد سړک د لومړۍ لیکې ۳ کیلو متره برخه مخکې قیر شوې ده اوس تر ۴ کیلو مترو پورې قیر کیږي او په همدې توګه د د دویمې لیکې ۴ کیلو متره برخه هم قیرچارو ته چمتو شوې ده چې، تر راتلونکې یوې اونۍ پورې به یې قیرچارې ترسره شي. ورته مهال په ۳ برخو کې د یاد سړک د غره د لمنې د کیندلو او د لښتیو جوړولو چارې هم په چټکۍ سره روانې دي ترڅو قیرچارو ته چمتو شي. د یاد سړک په ډیزاین کې د لښتیو، پلو لارو، ګلدانونو او استنادي دېوالونو جوړول، ترافیکي دهلیزونه او کرښې اچول شامل دي چې، چارې به یې د روان کال تر پایه بشپړې او ګټې اخیستنې ته به وسپارل شي.