د څلورمې ناحیې اړوند د میوو او ترکاري مارکېټ شاته سیمه کې (۹۸) جریبه غصب شوې ځمکه، د ځمکو د غصب دمخنیوي کمېسیون د پرېکړې پر بنسټ بېرته راوګرځول شوه. د څلورمې ناحیې رئیس مولوي عبدالرحمن رباني وویل چې، په یاده سیمه کې له پرلپسې خبرتیاوو وروسته د غاصبانو له لوري جوړ شوي ناقانونه تاسیسات پاک او ویجاړل شول او اوس مهال یاده ځمکه د کابل ښاروالۍ په واک کې ده، چې خپل پراختیايي پلانونه به پکې پلي کړي. نوموړي زیاته کړه، یاده ځمکه کلونه وړاندې د یو شمېر فرصت غوښتونکو او غاصبانو له لوري په بېلابېلو پلمو غصب شوې وه. د ښاغلي رباني په وینا؛ دوی په دې توانیدلي دي چې، په تېر یوه کال کې د یادې ناحیې په کچه (۱۴۳) جریبه غصب شوې ځمکه بېرته را وګرځوي. کابل ښاروالي ژمنتیا لري چې، د ښار په کچه غصب شوې ځمکې بېرته را وګرځوي او په هغو کې د غاصبانو له لورې جوړ شوي ناقانونه تاسیسات پاک او ویجاړ کړي.