کابل ښاروال مولوي عبدالرشید د شپاړلسمې ناحیې اړوند د بګرامیو منډوي د هټیوالو له استازو سره په کتنه کې د منډوي د ننه سړکونو او لښتیو د جوړولو، تنظیفي خدمتونو او نورو لومړنیو اړتیاوو په اړه بحث او خبرې وکړې. کابل ښاروال په خپلو خبرو کې وویل: د خصوصي سکټور د ودې او پانګې اچونې لپاره غوره پلانونه تر لاس لاندې دي او کابل ښاروالي چمتو ده ترڅو دوی ته آسانتیاوې رامنځته کړي. نوموړي زیاته کړه: کابل ښاروالۍ ژمنتیا لري چې، د خصوصي سکټور په مرسته د بګرامیو په منډوي کې چې، (۱۴۶) جریبه مساحت لري مثبت بدلونونه راولي. دغه راز کابل ښاروال د بګرامیو منډوي له هټیوالو وغوښتل چې، خپل فعالیتونه د ښاري اصولو او مقرراتو په چوکاټ کې ترسره کړي ترڅو د یادې منډوي نظم وساتل شي او ژمنه یې وکړه چې، په دغه سیمه کې به د کاري بوختیاوو رامنځته کولو په موخه، یاده منډوي د کابل ښار په یوه مهم سوداګریز مرکز بدله کړي.