د کابل ښاروالۍ له لوري د کابل ښار مهمې او نوموتې سیمې د کابل د فتحې او بریا د درېیمې کلیزې یا د زمري د ۲۴ مې په مناسبت د بیرغونو په نصبولو، رنګه څراغونو، د برښنايي سکرینونو او د ځانګړو پیغامونو د لوحو په نصبولو سره ښکلی شو. کابل ښاروال مولوي عبدالرشید له کابل ښار څخه د لیدني پر مهال وویل: له دې ویاړلې ورځې څخه نمانځنه یو ملي او حماسي کار دی او د دې خاورې مجاهد ملت تل پر باطل د حق د بریالیتوب ویاړ لري. کابل ښاروال ژمنه وکړه چې، د ښاریانو د سوکالۍ او هوساینې په موخه عمراني او د ښاري ښکلا پروګرامونه پراخیږي چې، د ښاریانو په مرسته به په ښه توګه عملي شي. ورته مهال د کابل ښاروالۍ د کلتوري چارو رئیس قاري ولي ګل جواد وویل: له دې ورځې څخه نمانځنه په حقیقت کې د هغه اتلانو یادونه ده چې د دوی د وینو نذرانه کولو او سرښندنو په برکت د هېواد آزادۍ، پرمختګ او امنیت ته زمینه برابره شوې او زموږ ملي او اسلامي ارزښتونه ساتل شوي دي. نوموړي وړاندې وویل: کابل ښاروالي د زمري د ۲۴ مې په مناسبت فرهنګي محفلونه، سپورتي نندارې، او نور په زړه پورې پروګرامونه لري چې يو پر بل پسې به ترسره شي. د یادونې وړ ده چې په دې مناسبت د کابل ښار عمده او نوموتي سړکونه او سیمې د ۴ زره څراغونو په نصبولو سره روښانه شول چې ورسره جوخت ښاري ښکلا هم زیاته شوه