د کابل ښاروالۍ د مرکزي څانګو د کارکوونکو د تیرو دریو کلونو د دیني او فقهي درسونو زده کړه د دې ادارې د دعوت او ارشاد ریاست لخوا په لیکلې بڼه وارزول شوه چې، د پايلو له اعلان وروسته به ممتاز کارکوونکي د یاد رياست له لوري وستايل شي. په تېرو (۳) کلونو کې د دعوت او ارشاد ریاست د مدرسینو له خوا د یاد ادارې د بېلابېلو ریاستونو کارکوونکو ته په منظمه توګه فقهي او عقیدتي درسونه ورکړل شوي دي، چې له امله یې اوس مهال د اسلامي مسایلو په اړه د کارکوونکو پوهه لوړه شوې ده او د چارو په ترسره کولو کې د پام وړ ښه والی راغلی دی. د کابل ښاروالۍ د ارشاد او دعوت رئیس مولوي رحمت الله صاحبزاده په دې اړه وویل: د کابل ښاروالۍ مشرتابه او کارکوونکي د دعوت او ارشاد د موخو په پلي کولو کې مخکښ دي او دې برخې ته ډېر پام کوي. نوموړي زیاته کړه چې، د مرکزي ریاستونو او ناحیو د کارکوونکو د فقهي او عقیدتي زده کړو کچه ارزول کیږي او د یاد ریاست مدرسین توانېدلي دي ترڅو په ښه توګه په دې برخه کې کارکوونکو ته معلومات ورکړي