د کابل ښاروالۍ د مارکېټونو د تنظیم ریاست له لوري د شپې مهال د ودونو په هوټلونو کې د هېواد له تازه مېوې څخه د ګټې اخیستنې له څرنګوالي څارنه وشوه چې، له نېکمرغه ډیری هوټلونو د نورو هېوادونو دمېوې پر ځای د خپل هېواد له تازه میوې څخه ګټه اخیسته. د کابل ښاروالۍ د مارکېټونو د تنظیم ریاست مرستیال عصمت الله انصار په دې اړه وویل: له مخکې ټولو هوټل لرونکو ته خبر ورکړل شوی دی ترڅو د بهرنیو میوو پر ځای یوازې د هېواد له تازه میوو څخه ګټه پورته کړي، ځکه دا کار د هېواد له داخلي تولیداتو څخه د ملاتړ او اقتصادي ودې په برخه کې له خورا ارزښت څخه برخمن دی. نوموړي زیاته کړه چې، د ښار په کچه د ودونو له ټولو هوټلونو څخه څارنه کیږي او سرغړونکي به له قانوني چلند سره مخ شي. ورته مهال یو شمېر هوټل لرونکو یو ځل بیا ژمنه وکړه چې، د هېواد له کرنیزو محصولاتو څخه د ملاتړ او د ملي اقتصادي د ودې په موخه به یوازې د هېواد له تازه میوو څخه ګټه اخلي، چې په دې کار سره به د هېواد بزګران لا وهڅول شي ترڅو د کرنې او بڼوالۍ په برخه کې لا ډېر کار وکړي