د کابل ښاروالۍ له لوري د پنځمې ناحیې اړوند له میرویس میدان ( کوټه سنګي) څخه د کمپنۍ تر څلورلارې پورې د (۸) کیلو مترو په اوږدوالي د سړک منځ ګلدان د اوسپنیزو کټارو د نصبولو چارې پیل شوې. د کابل ښاروالۍ د زرغونتیا ریاست مرستیال سراج الدین پټان په دې هکله وویل: د یاد سړک د منځ ګلدان زرغونه سیمه د پراختیا په حال کې ده چې، د ساتنې په موخه یې کټارې نصب کیږي. نوموړي زیاته کړه چې، دا کار د ترافیکي بهیر د تنظیم او د ښاري ښکلا رامنځته کېدو په برخه کې ګټور دی چې، تر نصبولو وروسته به دا کټارې رنګ هم شي. په دې ګلدان کې د نیالګیو او ګلانو سربېره چمن هم کرل شوی دی چې، په دوامداره توګه ترې ساتنه کیږي