د کابل ښاروالۍ د کار، ساتنې او مراقبت ریاست له لوري د (۶۰) مترو په اوږدوالي او (۱۸.۴) مترو په سور سره، د قلعه شانان سړک په اوږدو کې د کابل سیند د پاسه د موټرو د تګ راتګ لپاره د یوه لوی پله د جوړولو چارې روانې دي. دا پُل چې د (۹۰) میخي پایو په وسیله به منتاژ او نصب شي، اوس مهال یې بنسټیز کارونه روان دي چې وروسته به د پله فرش نصب او په وروستي پړاو کې به یې کانکرېټ او قیر چارې ترسره شي. ورته مهال له قلعه زمان خان څخه د کابل- جلال آباد سړک په اوږدو کې د حربي پوهنتون تر مخې پورې د سړک جوړولو چارې هم په چټکۍ سره روانې دي چې، د دې سړک او پله په جوړېدو سره به له یوې خوا د دولسمې او نولسمې ناحیې اوسېدونکو ته د تګ راتګ په برخه کې ګڼې آسانتیاوې رامنځته او بل خوا به د کابل- جلال آباد سړک، مکروریانو څلورلارې او د ور څېرمه سړکونو په ترافیکي بهیر کې د پام وړ کمښت رامنځته شي