د کابل ښاروالۍ د چاپېریال ساتنې او چاپېریالي روغتیا ریاست له لوري د کابل ښار په منډوي کې د وچې میوې د هټیو د حفظ الصحې له څرنګوالي څخه څارنه وشوه. د چاپېریالي روغتیا او چاپېریال ساتنې ریاست د خوړو توکو د کنترول آمر رحیم الله الکوزي په دې اړه وویل: تر دې مخکې د کابل منډوي د وچې میوې پلورونکو ته پوهاوی ورکړل شوی ؤ ترڅو خپل فردي نظافت او د چاپېریال پاکوالي ته پام وکړي او له ککړتیا څخه د وچې مېوي د خوندي ساتلو په موخه دې د هټیو مخې ته ښیښه يي خونې جوړې کړي چې اوس مهال د یو شمیر هټیوالو فعالیتونه د کابل ښاروالۍ د مقرراتو مطابق اصلاح شوي دي. د نوموړي په وینا؛ هغه هټیوال چې، خپل فعالیتونه یې له ښاري اصولو او سپارښتنو سره برابر کړي ؤ لا وهڅول شول او سرغړونکو ته اړینې سپارښتنې وشوې. له ښاري اصولو او په بازارونو کې د توکو له حفظ الصحې څخه څارنه، د کابل ښاروالۍ یو له هغه فعالیتونو څخه شمېرل کېږي چې، د خلکو له ملاتړ او رضایت سره مخ شوی دی