د ښار د اقتصادي او معیاري ودې په موخه، د کابل ښاروالۍ له لوري او د خصوصي سکتور په مرسته، د لومړۍ ناحیې اړوند له پُل خشتي څخه تر سپاهي ګمنام چوک پورې تر ځمکې لاندې یوه سوداګریز مارکېټ د جوړولو چارې چې څه موده وړاندې پیل شوې وې؛ ۸۰ سلنه مخته تللې دي. دغه مارکېټ چې په (۷۲۸۰) متر مربع مساحت سره په یوه پوړ کې د جوړېدو په حال کې دی، ټاکل شوې ده تر راتلونکې یوې نیمې میاشتې پورې یې چارې بشپړې او ګټې اخیستنې ته وسپارل شي. په یاد مارکېټ کې (۳۶۰) هټۍ، د وتلو او ننوتلو (۶) دروازې، تشنابونه، ښاري او لمریزه برښنا، د اور وژنې او خوندیتوب سیستمونه او برښنايي زینې په پام کې نیول شوې دي چې، د یادې سیمې د بازار د تنظیم سربېره به ترې ډیره ګټه پورته کړل شي. د يادونې وړ ده، چې کابل ښاروالۍ په ښاري سيمو کې د اقتصادي ودې او له کورني خصوصي سکټور څخه د ملاتړ په موخه، ورته نورې پروژې طرحه او پلې کوي او اوس مهال د ښار په بېلابېلو سيمو کې د ګڼو سوداګريزو مارکېټونو د جوړولو چارې روانې دي