کابل ښاروال مولوي عبدالرشید له ذاکرین ښارګوټي څخه تر قرغې سړک پورې د نوي سړک، د بادام باغ سړک، د خیرخانې کوتل سړک د دویمې برخې، له امید سبز ښارګوټي څخه تر عرفاني سړک، له پُل سوخته څخه د پُل سرخ په لور د سړک، د مکروریانو له څلورلارې څخه تر تنګي غارو پورې د سړک له لومړۍ برخې او د نودیک فامیلیو په سیمه کې د ځمکې د ښاري بیا پراختیا پروژې له لومړۍ برخې څارنه وکړه او قراردادي شرکتونو ته د اړینو سپارښتنو سربېره، په یو شمېر پروژو کې د بې کیفیته کار مخه ونیول شوه. کابل ښاروال قرادادي شرکتونو ته په ټینګار سره وویل چې، د پروژو په کار کې سرغړونې ښاریانو او د کابل ښاروالۍ مشرتابه ته د منلو وړ نه دي او په جدي توګه تعقیب او څارل کیږي؛ د پروژو په چارو کې د سرغړونې په صورت کې هغه برخه چې، بې کیفیته جوړه شوې وي بېرته ویجاړېږي او د بیا ځلي سرغړونې په صورت کې به کابل ښاروالۍ له قراردادي شرکت سره خپل قرارداد فسخ کړي. ورته مهال کابل ښاروال د کیفیت په پام کې نیولو سره د پروژو د کار پر چټکتیا ټینګار وکړ او مسئولینو ته یې په دې برخه کې لارښونې وکړې چې، پر بنسټ به یې د پروژو چارې چټکې او د ګڼه ګوڼې ستونزې به هوارې شي.