کابل ښاروال مولوي عبدالرشید د خپل کاري وخت یوه برخه د سړک جوړونې او له نورو ټولګټو پروژو څخه لیدنې او څارنې ته ځانګړې کړې ده او تل يې د کار پر کیفیت او چټکتیا ټینګار کړی دی. د دې څارنو په لړ کې يې تېره ورځ له مازدیګر څخه د شپې تر ناوخته پورې د هوايي ډګر له څلولارې بیا تر ګمرک سیمې، د مکروریانو له څلورلارې څخه تر تنګي غارو پورې او له دهمزنګ څخه تر کوټه سنګي( میرویس میدان) پورې د سړک جوړونې له پروژو څخه څارنه وکړه او هغه کارکوونکي چې، د پروژو په چارو کې یې وړتیا ښودلې وه تشویق شول او هغوی چې په دې برخه کې یې غفلت او بې پروايي کړې وه، اړینې سپارښتنې ورته وشوې. کابل ښاروال ټینګار وکړ چې، بې کیفیته کار ورته د منلو وړ نه دی او د ټولګټو پروژو په ترسره کولو کې د بیا ځلي سرغړونو په صورت کې به سرغړونکي له قانوني چلند سره مخ شي. اوس مهال د ښار په کچه د سړک جوړونې لسګونه پروژې د پلي کېدو په حال کې دي چې، له بېلابېلو پړاونو څخه یې کابل ښاروالې رهبري په دوامداره توګه څارنه کوي.