د کابل ښاروالۍ د مارکېټونو د تنظیم ریاست له لوري د څلورمې او یوولسمې ناحیې اړوند د تایمني پروژې او د هوايي ډګر سړک سیمو په بازارونو کې د لومړنیو توکو د نرخونو د کنترول او له احتکار څخه د مخنیوي په موخه څارنه وشوه. د کابل ښاروالۍ د مارکېټونو د تنظیم رئیس مولوي مدثر محمد یونس وویل چې، په هټیو، لویو پلورنځیو، د وچې میوې په پلورنځیو، قصابیو او د تیلو په ټانګونو کې نرخونه وڅارل شول او سرغړونکو ته د اړینو سپارښتنو سربېره، ټینګار وشو ترڅو انصاف په پام کې ونیسي او خپل توکي د کابل ښاروالۍ د نرخنامې مطابق وپلوري. نوموړي زیاته کړه چې، پلورونکي باید خپل توکي د ټاکل شوې نرخنامې له مخې وپلوري او د بیاځلي سرغړونې په صورت کې به له قانوني چلند سره مخ شي. د مارکېټونو د تنیظم رئیس غوښتنه وکړه چې، ټول ښاریان باید له نرخنامې څخه د ګټې اخیستنې کلتور په دودولو کې د کابل ښاروالۍ له مسئولینو سره مرسته وکړي. د یادونې وړ ده چې، مخکې ټولو اصنافو ته سپارښتنه شوې ترڅو نرخنامه د خپلو پېرودونکو د لید وړ ځای کې وځړوي او د هغه له مخې دې خپل توکي وپلوري