د کابل ښاروالۍ د مسئولینو، د سوداګرۍ، مالیې، عدلیې او کورنیو چارو وزارتونو، د استخباراتو ریاست، د افغانستان بانک، د سوداګرۍ او پانګې اچونې خونې، د نفت او ګاز شرکت، د ستندرد ملي ادارې او د اصنافو د استازو په ګډون د نرخونو د کنترول او له احتکار څخه د مخنیوي کمیسیون له لوري د (۴۰) مې ګڼې نرخنامې د جوړولو په اړه غونډه ترسره شوه. په دې غونډه کې د کابل په بازارونو کې د خوراکي توکو د بیو د کنترول او را ټېټولو، د لومړنیو خوراکي توکو د بیو لوړېدو په برخه کې د یوې کړنلارې جوړولو، له ګاونډیو هېوادونو څخه د وارداتو د څرنګوالي او د اسعارو د بیو د بدلون په اړه بحث او خبرې وشوې. دغه کمیسیون له ټولو پلورونکو او سوداګرو څخه غوښتنه کوي چې، د لومړنیو خوراکي توکو د وړاندې کولو په وخت انصاف په پام کې ونیسي؛ ځکه په دې برخه کې محدودیتونه له منځه تللي دي او د بهرنیو اسعارو پر وړاندې د افغانیو بیه هم لوړه شوې ده. د نرخونو د کنترول او له احتکار څخه د مخنیوي کمیسیون د لومړنیو خوراکي توکو د بیو د کنترول په برخه کې خپلې کړنې جدي کوي ترڅو ښاریان وکولای شي په مناسب قیمت خپل د اړتیا وړ لومړني خوراکي توکي له بازارونو څخه ترلاسه کړي