د نهمې او پنځلسمې ناحیو اړوند د هوايي ډګر ختیځ خواته د سطحي اوبو لېږدولو لوی کانال د جوړولو چارې ۷۰ سلنه مخته تللې دي او ټاکل شوې ده تر راتلونکې یوې نیمې میاشتې پورې بشپړې شي. د کابل ښاروالۍ د برنامو او پروژو د تنظیم ریاست د معلوماتو له مخې؛ دغه کانال چې، د هوايي ډګر د جنوبي سیمو سطحي اوبه، په شمالي برخه کې د وزیر آباد کانال ته لېږدوي، (۳۵۲۰) متره اوږدوالی، له (۲.۲ )څخه تر (۲.۴) مترو پورې سور او له (۱.۸) څخه تر (۲.۲) مترو پورې ژوروالی لري، تر اوسه یې (۲.۴) کیلو متره برخه جوړه شوې ده. د دې کانال په جوړېدو سره به له یوې خوا په یادو سيمو کې د اوبو د ډیرښت ستونزې په بشپړه توګه هوارې او بله خوا به د سړکونو له ژر ویجاړېدو څخه په بنسټيزه توګه مخنيوى وشي