د پنځمې ناحیې د مسئولینو او ګڼ شمېر ښاریانو په ګډون د یادې ناحیې په بېلابېلو سیمو کې تنظیفي حشر ترسره شو چې، په پایله کې یې یوه اندازه کثافات راټول او له ښار څخه د باندې ولېږدول شول. د کابل ښاروالۍ د خپرونو او عامه پوهاوي ریاست د عامه پوهاوي آمر محمد یاسین امین د ښار پاکوالی د ټولو ښاریانو ملي او دیني دنده وبلله او د حشر له ګډونوالو یې وغوښتل چې، د خپلو کورونو مخې ته د سیمو په پاک ساتلو سره د کابل ښاروالۍ ملتیا وکړي. دغه راز د پنځمې ناحیې د ښاري خدمتونو آمر قاري حکمت الله حقمل د سیمې اوسېدونکي دګډو کارونو ترسره کولو ته وهڅول او ویې ویل: اړتیا ده چې، د ښار د پاکوالي په برخه کې ټول پیاوړې روحیه ولرو او د خپلو کوڅو او لښتیو پاک ساتلو ته پام وکړو. ورته مهال د پنځمې ناحیې د ځوانانو شورا غړو او د تنظیفي خدمتونو د شرکتونو مسئولینو له کابل ښاروالۍ سره د همکارۍ ژمنه وکړه او ویې ویل: د ښار پاکوالی یوازې د کابل ښاروالۍ د نارنجي اغوستونکو مسئولیت نه دی، بلکې په دې برخه کې موږ ټول مسئولیت لرو