د کابل ښاروالۍ له لوري او د خصوصي سکتور په مرسته، د دویمې ناحیې اړوند د فروشګاه په سیمه کې د یوه سوداګریز مارکیټ د جوړولو چارې چې په روان کال کې پیل شوې دي؛ تر اوسه (۷۰) سلنه مخته تللې دي او ټاکل شوې ده تر راتلونکو (۴) میاشتو پورې بشپړې شي. دغه مارکېټ د اقتصادي ودې په موخه، په (۱۶۴۳) متر مربع ځمکه کې د دوو تهکویو په لرلو سره په (۹) پوړونو کې د کابل ښاروالۍ د نقشې مطابق جوړېږي چې، دوه لاندني پوړونه یې د وسایطو د پارکینګ او پورتني پوړونه یې د (۶۷۰) هټیو لپاره ځانګړي شوي دي. دغه راز په دې سوداګریز مارکېټ کې د لمریزې او ښاري برښنا سربېره، د خوندیتوب مسایل، د اور وژني سیستم، جومات، د سپورټ او نندارتون لپاره ځانګړي ځایونه او د وتلو او ننوتلو دروازې هم په پام کې نیول شوي دي. د یادونې وړ ده چې، د کابل ښار د اقتصادي ودې په موخه، د کابل ښاروالۍ د نقشې مطابق د ښار په بېلابېلو سیمو کې د یو شمېر سوداګریزو مارکېټونو د جوړولو چارې روانې دي چې، د ښاري ښکلا رامنځته کولو سربېره یې، ګڼ شمېر هېوادوالو ته کاري زمینه هم برابره کړې ده