د چارو د پر وخت او ښه ترسره کېدو په موخه د کابل ښاروال مولوي عبدالرشید په مشرۍ د یو شمېر مهمو موضوعاتو په اړه د اداري شورا غونډه ترسره شوه. په دې غونډه کې چې، د کابل ښاروالۍ مرستیالانو، د مرکزي ریاستونو او د دوه ویشت ګونو ناحیو رئیسانو ګډون کړی ؤ؛ د مالي مدیریت په سیسټم کې د ملکیتونو او جایدادونو د ثبت، د ښار په کچه د یو شمېر نویو ګذرونو د جوړولو، ګرځنده پلورونکو ته د بدیلو ځایونو د ټاکلو، له شخصي ملکیت پرته په نورو ځایونو کې د څاګانو د کېندلو، او د یو شمېر هغه غرفو د برخلیک معلومولو په اړه بحث او خبرې وشوې چې، د باقیاتو له امله راټولې شوې وې. کابل ښاروال مسئولانو ته لارښوونه وکړه چې، د ښاري مدیریت اړوند ټولو مسایلو ته پام وکړي، قانون په ټولو یو ډول پلی کړي او د ښاري سرغړونو مخه ونیسي. نوموړي ډاډ څرګند کړ چې، د ارزول شویو پلانونو له مخې به د ښاریانو ډیری ستونزې هوارې شي او اړتیا ده چې، ښاریان هم له کابل ښاروالۍ سره د پلانونو د پلی کولو په برخه کې همکاري وکړي، ترڅو یو منظم، قانونمند او آباد ښار ولرو