د کابل ښاروالۍ له لوري د بیا کور موندلو په موخه، د پنځلسمې ناحیې اړوند د پنجصد فامیلیو په سیمه کې د ښاري بیا پراختیا پروژې د دویمې برخې چارې روانې دي. په دې سیمه کې دوه اته او دولس پوړیز بلاکونه په ټولیزه توګه ۱۲۳۴ متر مربع ځمکه کې د یوې تهکوۍ په ګډون جوړېږي چې، د اته پوړیز دوه پوړونه سوداګریز او پاتې یې استوګنیز او د دوولس پوړیز (۳) پوړونه سوداګریز او پاتې یې استوګنیز دي. دغه راز په یاده سیمه کې په ټولیزه توګه ۷۸ استوګنیز آپارتمانونه، هټۍ او لوی پلورنځي هم په نظر کې نیول شوي دي. په یاده پروژه کې زرغونې سیمې، پلې لارې، د وسایطو پارکینګ، د برښنا بُرج، غیر متمرکزه د فاضلاب تصفیه خونه، د مرکز ګرمۍ سیستم او نورې اساسي اړتیاوې هم په پام کې نیول شوې دي. کابل ښاروالي پلان لري ترڅو د پروژو په پلي کولو کې د ځمکو د استملاک پر ځای د پرمختللې نوې کړنلارې (د ځمکو بیا تنظیم او پراختیا) څخه د کابل ښار د پراختیا په برخه کې کار واخلي