د اوومې ناحیې د مسئولانو او د یادې ناحیې د تنظیفي شرکتونو د استازو، د دیني عالمانو او ځوانانو شورا د غړو په ګدون تنظیفي حشر ترسره شو چې، په پایله کې یې د چهلستون له نهه برجه او یو شمېر نورو سیمو څخه تیت شوي کثافات راټول او ځانګړي ځای ته ولېږدول شول. د اوومې ناحیې رئیس فضل الحق مجاهد وویل: د دې حشر په پایله کې په تنظیفي چارو کې وروسته پاتې والی جبران شو او د سیمې له اوسېدونکو غوښتنه وکړه چې، کثافات په ټاکل شویو ځایونو کې واچوي ترڅو د کابل ښاروالۍ پرسونل وکولای شي هغه په وخت ولېږدوي. په همدې توګه د کابل ښاروالۍ د خپرونو او عامه پوهاوي ریاست د عامه پوهاوي آمر محمد یاسین امین د اوومې ناحیې اوسېدونکي د ښاري سیمو پاک ساتلو ته را وبلل او ویې ویل: د ښاریانو له همکارۍ پرته د کابل ښاروالۍ پرسونل نه شي کولای د ښار ټولو برخو ته لازمه رسېدنه وکړي. ورته مهال ګډونوالو ژمنه وکړه چې، د خپلې سیمې پاک ساتلو ته به پاملرنه کوي او د کابل ښاروالۍ له کارکوونکو سره به دومداره مرسته کوي