د کابل ښاروال مولوي عبدالرشید په مشرۍ د یادې ادارې د مرستیالانو او د مرکزي ریاستونو او ناحیو د رئیسانو په ګډون د ۱۴۰۴ کال د پرمختیايي پلان د جوړولو په اړه وروستۍ ناسته ترسره شوه او پکې برابرې پراختیا او لومړیتوبونو ته په کتو یو شمېر نوې ټولګټې پروژې انتخاب شوې چې، په پلان کې به ځای ورکړل شي. کابل ښاروال د نویو سړکونو د جوړولو په اړه وویل: د ماسټرپلان له مخې دې لومړی د سړکونو سروې ترسره او تر ډیزاین وروسته دې د پروژو د تدارکاتي پړاوونو په اړه اقدام وشي او د ۱۴۰۴ کال په لومړیو کې باید عملي چارې پیل شي. د تخنیکي او فني مشورو په بنسټ به د اصلي او فرعي سړکونو جوړول، په سړکونو د څراغونو نصبول، د پلولارو، کانالونو، لښتیو، پلونو او پلچکونو جوړول، د زرغونو سیمو پراختیا، د ماشینرۍ او تجهیزاتو پېرل، د یو شمېر پروژو ډیزاین او د ښاري تاسیساتو بیارغول به د ۱۴۰۴ کال د پرمختیايي پلان برخه وي او یاد پلان به د کابل ښار د پراختیا په برخه کې یو جامع پلان وي