د اوومې ناحیې اړوند د علاءالدین له درې لارې څخه تر تخنیکم پورې د نوي نښلوونکي سړک د جوړولو لومړنۍ چارې، د (۱۱۹) میلیونه، (۲۸۱) زرو او (۲۵٠) افغانیو په لګښت، د کابل ښاروالۍ د ودانیزوچارو د مرستیال انجنیر عامر زمرک یاسر په حضور کې پیل شوې. ښاغلي یاسر په دې اړه وویل: د دغه سړک د جوړولو چارې چې، (۱۷۶۷) متره اوږدوالی او (۳۰) متره سور لري، او د دارالامان سړک د چهلستون له سړک سره نښلوي، د یوه کال په موده کې به بشپړې شي. نوموړي د دغه سړک په اوږدو کې له میشتو اوسېدونکو وغوښتل، چې د دې مهم سړک د جوړولو د پروژې په پلي کولو کې له کابل ښاروالۍ سره مرسته وکړي. دغه راز د کابل ښاروالۍ د برنامو او پروژو د تنظیم رئیس انجنیر میرالرحمن ناصري په خپلو خبرو کې وویل: د سړک جوړونې په دې پروژه کې د لښتیو، پلولارو، ګلدانونو جوړول، د پایو او څراغونو نصبول، په سړک د کرښو اچول او د یوه معیاري سړک نور جزئیات شامل دي. د یادولو وړ ده چې، د کار د ښه کیفیت د تضمین او په ټاکلي وخت د دې پروژې د پلي کېدو په موخه، د یادې پروژې له بېلابېلو پړاوونو څخه فني او تخنیکي څارنې ترسره کیږي