د کابل ښاروالۍ د ولسي او ټولنیزو چارو د همغږۍ ریاست له لوري د یوولسمې ناحیې له ګذر وکیلانو، مخورو او ځوانانو سره د یادې ناحیې په کچه د ښاري ستونزو د پېژندلو او حل لارو موندلو او د ګذر وکیلانو د ګمارلو او لېرې کولو د نوي لارښود د تشریح په موخه مشورتي ناسته ترسره شوه. د کابل ښاروالۍ د ولسي او ټولنیزو چارو د همغږۍ رئیس قاري انعام الله قاضي زاده د ګذر وکیلانو د ګمارلو او لېرې کولو د نوي لارښود تشریح کولو سربېره وویل : کابل ښاروالي لومړیتوبونو او د خلکو د پرځای غوښتنو پر بنسټ خپل پلانونه جوړ او پلي کوي او اړتیا ده چې، د دې لویې خدماتي ادارې د پلانونو په پلي کولو کې ټول ښاریان په ځانګړې توګه ګذر وکیلان چې، د ښاریانو استازي ګڼل کیږي پوره همکاري وکړي. ورته مهال د یوولسمې ناحیې رئیس مولوي ذبیح الله نبي خیل او د یادې ناحیې ګذر وکیلانو په خپل وار د سړکونو د خاموالي، عوایدو راټولولو، د زرغونو سیمو د پراختیا، ښاري نظم او نورو برخو کې خپلې ستونزې د ولسي او ټولنیزو چارو له ریاست سره شریکې کړې ترڅو پر وخت ورته رسېدنه وشي. د یادونې وړ ده چې، د کابل ښاروالۍ مسئولانو د خلکو د ستونزو د حل په برخه کې په کلکه هڅې کوي او په همدې موخه به دا مشورتي ناستي دوام ولري