د کارد کیفیت او چټکتیا په موخه د کابل ښاروالۍ د ښاري خدمتونو او چاپېریال ساتنې مرستیال مولوي محمد خالد سجستاني او د ودانیزو چارو مرستیال انجنیر عامر زمرک یاسر له هنګرها څلورلارې څخه تر قصبې سړک او له لب جر څخه تر سرای شمالي پورې د سړک او د وزیر آباد کانال د پاسه د د دوه پلونو د جوړولو له پروژو څخه څارنه وکړه. د کابل ښاروالۍ مرستیالانو د سړک جوړونې په پروژو کې د کار پر کیفیت ټینګار وکړ او ویې ویل چې، له هنګرها څلورلارې څخه تر قصبې پورې او د یاد سړک په اوږدو کې د وزیر آباد کانال د پاسه د دوه پلونو د جوړولو چارې دې هرڅه ژر بشپړې او د ترافیکو پرمخ دې پرانیستل شي. په همدې توګه د کابل ښاروالۍ مرستیالانو مسئولانو ته لارښوونه وکړه چې، له لب جر څخه تر سرای شمالي پورې سړک دې چې، په وروستیو کې یې په یوه لیکه کې د یوه کیلو متر په اوږدوالي او د ۱۴.۱۵ مترو په سور سره د یوې برخې قیر چارې ترسره شوې دي هرڅه ژر دې د ترافیکو پرمخ پرانیستل شي ترڅو د یاد سړک په اوږدو کې د ګڼه ګوڼې ستونزې هوارې او ښاریانو ته آسانتیاوې رامنځته شي. د کابل ښاروالۍ مشرتابه ټینګار کوي چې، د هوا د ښه والي په صورت کې دې د سړکونو چارې د ژمي لپاره د تدابیرو په نیولو سره پرمخ یوړل شي او هڅه دې وشي ،چې د کار د سرعت ترڅنګ کیفیت هم په پام کې ونیول شي.