د نهمې او پنځلسمې ناحیې اړوند د هوايي ډګر ختیځ خواته د اوبو لېږدولو لوی کانال د جوړولو چارې په چټکۍ سره روانې او هڅه کیږي چې، تر راتلونکې یوې میاشتې پورې بشپړې او ګټې اخیستنې ته وسپارل شي.
د کابل ښاروالۍ د برنامو او پروژو د تنظیم ریاست د معلوماتو له مخې؛ دغه کانال چې، د هوايي ډګر د سویل سیمو د ځمکې سطحي اوبه شمال خوا ته د وزیر آباد کانال ته لېږدوي؛ د ۳۵۲۰ مترو په اوږدوالي، له ۲،۲ څخه تر ۲،۴ مترو په سور، د ۱.۸ او ۲.۲ مترو په ژوروالي سره د جوړېدو په حال کې دی چې، تر دې دمه یې ۸۰ سلنه چارې مخته تللې دي او د ژمنيو تدابیرو په پام کې نیولو سره به یې چارې مخته ځي. د دې کانال په جوړېدو سره به له یوې خوا د اوبو راختلو ستونزې هوارې او له بل لوري به د سړکونو له ژر وېجاړېدو څخه په بنسټیزه توګه مخنیوی وشي.