د کابل ښاروالۍ د کار، ساتنې او مراقبت ریاست له لوري د پنځلسمې ناحیې اړوند له هنګرها څلورلارې څخه تر قصبې سړک پورې د نوي سړک په اوږدو کې د موټرو د تګ راتګ د دوو لویو پلونو د جوړولو چارې بشپړې او ترافیکو پر مخ پرانیستل شول. د کار، ساتنې او مراقبت ریاست فني مرستیال محمد داود ځواب په دې هکله وویل: دغه دوه پلونه چې هر یو یې (۱۲.۸) متره اوږدوالی او (۱۲.۸) متره سور لري، د (۱۵) میلیونه افغانیو په لګښت د (۶) میاشتو په موده کې په بنسټیزه توګه جوړل شول. ورته مهال له هنګرها څلورلارې څخه تر قصبې سړک پورې د (۱۸۹۰) مترو په اوږدوالي او (۴۵) مترو په سور سره د نوي نښلوونکي سړک د جوړولو چارې چې، په روان کال کې پیل شوې وې، تر اوسه (۹۰) سلنه مخته تللې دي او د هوا د ښه والي په صورت کې به بشپړې شي. د دې سړک او یادو پلونو په جوړېدو سره به د سلطان محمود غزنوي سړک، د کورنیو چارو وزارت لوېدیځ لوري ته د سړک، د پنجصد فامیلیو د سړک او ورڅېرمه نورو سړکونو کې ترافیکي ستونزې هوارې او ښاریانو ته به د تګ راتګ په برخه کې ګڼې آسانتیاوې رامنځته شي