د کابل ښاروالۍ د نقشې او نړیوالو معیارونو مطابق، په نادر پښتون واټ کې د خیرخواه ستر سوداګریز مارکېټ ( د الکترونیکي وسایلو کمپلکس) د جوړولو چارې له څه باندې دوه کلونو وروسته بشپړې شوې. د نادر پښتون واټ د سوداګرو ټولنې رئیس حاجي مختار شریفي په دې اړه وویل: دغه ستر سوداګریز مارکېټ چې په (۹۶۰۰) متر مربع ځمکه کې د دوو تهکویو په ګډون د (۹) پوړونو په درلودلو سره ډیزاین شوی دی، په نږدې راتلونکې کې به ګټې اخیستنې ته وسپارل شي. د دې مارکېټ جوړېدل له خصوصي سکټور څخه د ملاتړ او د کابل ښار د اقتصادي ودې په برخه کې ډیر اهمیت لري. په دې مارکېټ کې (۱۳۶۰) هټۍ، یو جومات، د (۱۳۰۰) موټرو لپاره پارکېنګ، (۱۷۰) تشنابونه، لفت، برښنایي زینې، لمریزه او ښاري برښنا، د اور وژنې او خوندیتوب سیستمونه، د وتلو او ننوتلو دروازې په پام کې نیول شوې دي. د خیرخواه سوداګریز مارکېټ د جوړولو پروژه د خصوصي سکټور ( د سوداګرو ملي ټولنې) په ملاتړ او د چارو ادارې تر مدیریت لاندې ترسره شوې ده چې، مالیې وزارت، ملي بانک، کابل ښاروالۍ او خصوصي سکټور یې د مالکیت حق لري. دا په داسې حال کې ده چې، د کابل ښار د اقتصادي ودې په موخه، د ښار په بېلابېلو سیمو کې د یو شمېر نورو سوداګریزو مارکېټونو دجوړلو چارې هم د خصوصي سکټور په مرسته تر لاس لاندې دي چې، په نږدې راتلونکې کې به بشپړې او ګټې اخیستنې ته وسپارل شي