کابل ښاروال مولوي عبدالرشید د پنځمې ناحیې له یو شمېر مشرانو او اوسېدونکو سره د هغوی ستونزو ته د رسېدنې په موخه ولیدل. په دې لیدنه کې کابل ښاروال دیادې ناحیې د اوسېدونکو د ستونزو تر اورېدو، د سړکونو، لښتیو، کانالونو، پارکونو او زرغونو سیمو د جوړولو، تنظیفي خدمتونو او د ښاري نظم د ښه مدیریت په برخه کې د کابل ښاروالۍ د پلانونو په اړه رڼا واچوله او ویې ویل: د پنځمې ناحیې د ستونزو د هوارولو په موخه به لازم اقدامات ترسره شي. نوموړي زیاته کړه: د ښار په بېلابېلو سیمو کې د متوازنې پراختیا د اصولو پر بنسټ، د یو شمېر عامه او ټولګټو پروژو د پلي کېدو چارې روانې دي او یو شمېر نورې به په راتلونکي کې هم پیل شي. په ورته وخت کې د يادې ناحیې مشرانو او استازو د کابل ښاروالۍ د وروستيو کړنو د ستايلو سربېره، له کابل ښاروال څخه يې د عزت پګړۍ په سر کولو سره مننه وکړه