د کابل ښاروالۍ د کار ساتنې او مراقبت ریاست له لوري له دیوان بیګي څخه تر مهتاب قلعه پورې د نښلوونکي سړک لومړنۍ چارې چې کیندنې او خاورې لېږدول په بر کې نیسي روانې دي ترڅو د سړک اساسي جوړولو ته زمینه برابره شي. دا سړک پنځمه، شپږمه او دیارلسمه ناحیه او د کمپنۍ سړک له برچي سړک سره نښلوي چې، په اوږدو کې یې د کابل سیند د پاسه د موټرو د تګ رتګ یو پُل هم جوړېږي. له دیوان بیګي څخه تر مهتاب قلعه پورې سړک ۱۷۳۳ متره اوږدوالی او ۳۰ متره سور لري چې لښتیو او پلو لارو جوړول، د بایسکل چلولو لیکې، ګلدانونه او کرښې اچول په بر کې نیسي. د دې مهم نښلوونکي سړک چارې به تر راتلونکي یوه کال پورې په اساسي توګه بشپړې شي او ورسره جوخت به د سیمو اقتصادي ودې ته زمینه برابره شي