د لومړنیو خوراکي توکو د نرخونو د کنټرول او له احتکار څخه د مخنیوي، له ګاونډیو هېوادونو څخه هېواد ته د وارداتو د څرنګوالي په اړه غونډه ترسره شوه چې تر بحث او خبرو وروسته ۴۳ ګڼه نرخنامه جوړه شوه. په همدې توګه په یاده غونډه کې پرېکړه وشوه چې د لومړنیو خوراکي توکو د نرخونو د کنټرول په اړه دې څارنې لا ګړندۍ شي ترڅو ښاریان و کولای شي په مناسب قیمت له بازارونو څخه خپل د اړتیا وړ تړکي ترلاسه کړي. د نرخونو د کنټرول او له احتکار څخه د مخنیوي کمیسیون د کابل ښاروالۍ، کورنیو چارو، مالیې، سوداګرۍ او عدلیې وزارتونو، د استخباراتو ریاست، د افغانستان بانک، لوی نظارت، د سوداګرۍ او پانګونې خونې، د احصایې او معلوماتو ملي ادارې، کسبګرو، هټیوالو، د نفت او ګاز امارتي شرکت، ستندرد ادارې او د اصنافو له استازو جوړ دی، چې د بازارونو وضعیت ته په کتو غونډه ترسره کوي او د اجرا په موخه اړینې پرېکړې کوي.