د ښاري نظم د ټینګښت په موخه، د ښاري نظم کمېټې له خوا د عامې روغتیا له څلورلارې څخه دهوايي ډګر تر څلورلارې پورې د سړک په اوږدو کې د ښاري نظم له څرنګوالي څخه څارنه وشوه. د کابل ښاروالۍ د مارکېټونو د تنظيم ریاست مرستيال عصمت الله انصار په دې اړه وويل: د دې سړک په اوږدو کې د بېلابېلو برخو فعالیت کوونکو ته له وړاندې ويل شوي وو، چې په پلولارو کې دې د خپلو توکو له ایښودلو څخه ډډه وکړي. نوموړي زياته کړه، چې د ښاري نظم د رامنځته کولو په موخه به، په یاده سیمه کې د ګرځنده پلورونکو د غیر قانوني فعالیت، د هټیوالو د سرغړونو او د لیني موټرو د تم کېدو مخه ونیول شي. د ښاري نظم کمېټه چې، د بېلابېلو ادارو له استازو څخه جوړه شوې ده، خپل عملیاتي پلان په بشپړې همغږۍ سره پلی کوي تر څو د ښار په بېلابېلو سیمو کې ښاري نظم رامنځته او د سرغړونو مخه ونیول شي