د کابل ښاروالۍ له لوري د یادې ادارې د وروستیو پنځو میاشتو د مهمو لاسته راړونو په اړه د حکومت د رسنیو په مرکز کې رسنیز کنفرانس ترسره شو. د یاد کنفرانس په پیل کې د کابل ښاروالۍ د پلان پالیسۍ، څارنې او ارزونې رئیس محمد قاسم افغان خبرې وکړې او ویې ویل: په ۱۴۰۳ کال کې کابل ښاروالۍ په خپل پراختیايي پلان کې ۱۶۵ ټولګټې پروژې پلان کړې وې چې، د پلي کولو چارې یې روانې دي. نوموړي دغه راز وویل: د ۱۴۰۴ کال په پرمختیايي پلان کې د تخنیکي او فني مشورو پر بنسټ ۲۵۸ پروژې په نظر کې نیول شوې دي چې، ۶۸ پروژې په کابل ښار کې د سړکونو جوړولو ته ځآنګړې شوې دي او په پراختیايي پلان کې د ۱۴۰۳ کال څخه را انتقال شویو ۷۸ پروژو ته هم ځای ورکړل شوی دی. ورپسې د کابل ښاروالۍ استازي نعمت الله بارکزي په خپلو خبرو کې وویل: د ۵۴ کیلو متره اصلي او فرعي سړکونو او کوڅو جوړول په تېرو پنځو میاشتو کې د کابل ښاروالۍ مهم فعالیت وو چې، د قیر، کانکرېټ او د تیږو فرش په بڼه جوړ شوي دي. نوموړي وړاندې وویل: ۴۳ کیلومتره سړکونه بیارغول شوي دي، د ۲۳۱۶ مترو په اوږدوالي د ځمکې د سطحي اوبو د مدیریت لپاره نوي کانالونه جوړ شوي، نږدې سل زره نیالګي د خزاني کمپاین په لړ کې د کابل ښاروالۍ د زرغونتیا په موخه کینول شوي او د ښار له بېلابېلو سیمو څخه ۳۷۲ مټریک ټنه کثافات راټول او له ښاره د باندې لېږدول شوي. په همدې توګه د پراختیايي پلانونو د تطبیق په موخه ۱.۶ میلیاده افغانۍ د استملاکي ملکیتونو مالکانو ته د بدیلو حقونو په توګه ورکړل شوې دي. د مرکز ګرمۍ سیسټم د شتون او فعالوالي په موخه له ۳۱۶ ودانیو څخه څارنه شوې، د ۲۳۸۷ اصنافو له حفظ الصحې څارنې شوې، ۷۸ ټنه بې کیفیته او تیر وخته توکي لمنځه وړل شوي، لښتیو او کابل سیند ته د ۱۲۲ مورده فاضلاب لارې بندې شوې دي، په ګڼه ګوڼه لرونکو سیمو کې ښاري نظم څارل شوی، په بازارونو کې د نرخنامې له تطبیق او څرنګوالي څارنه شوې، په علاءالدین پارک کې یو کتابتون او د لمانځه ځای جوړ شوی، د کابل ښاروالۍ له فعالیتونو څخه ۹ سوه ویډیويي کلپونه جوړ شوي، او د ګمارنې پروسې له لارې د کابل ښاروالۍ په ۳۷۴ خالي بستونو کې وړ کسان ګمارل شوي دي. ښاغلي بارکزي دغه راز وویل چې، کابل ښاروالۍ له خپلو شته امکاناتو څخه په ګټه اخیستلو توانېدلې ده چې، ښاریانو ته غوره ښاري خدمتونه وړاندې کړي او د ښار په کچه مهمې ټولګټې پروژې پلې کړي. نوموړي له ښاریانو غوښتنه وکړه چې، له کابل ښاروالۍ سره د پروژو په پلي کېدو کې همکار و اوسي ترڅو د یوه ښایسته او آباد کابل ښار شاهدان و اوسو