د کابل ښاروالۍ په وړاندیز او د ریاست الوزراء د محترم مقام په منظورۍ، حاجي عبدالرحمن اخندزاده په دویم بست کې د شلمې ناحیې د نوي رئیس په توګه ټاکل شوی او د کابل ښاروالۍ د مقام د دفتر رئیس مفتي عبدالقادر نعماني له خوا خپلو همکارانو ته ور وپېژندل شو. په هغه پېژندغونډه کې چې له همدې امله جوړه شوې وه، د کابل ښاروالۍ دمقام د دفتر رئيس د چارو د چټکتيا او همغږۍ په اړه د دې سترې ادارې د مشرتابه سپارښتنې څرګندې کړې او ويې ويل: په اداره کې د چارو د سمون او ښه والي په موخه، بدلون یو اصل دى. نوموړي زیاته کړه چې، ښاغلی اخندزاده یو ژمن او صادق شخص دی او ښه کاري تجربه لري. ښاغلي نعماني د خپلو خبرو په دوام وویل: د کابل ښاروالۍ مشرتابه هیله لري، چې د ښاریانو رضایت د ترلاسه کولو په موخه به د کابل ښاروالۍ ټول کارمندان خپلې چارې په مسئولیت او ایماندارۍ ترسره کړي. نوموړي د شلمې ناحیې کارکوونکو ته په ټینګار سره وویل چې، مراجعینو ته دې د خدمتونو وړاندې کولو او د ښاري مدیریت په برخه کې خپلې ورسپارل شوې چارې په مسئولیت ترسره کړي ترڅو د ورورولۍ او صمیمیت فضا رامنځته شي