د کابل ښاروالۍ د زرغونتیا ریاست اړوند قوریو، ګلخانو او شنو خونو له لارې د سلګونه زره نباتي بوټو د روزنې او پالنې چارې تر لاس لاندې دي چې، د ۱۴۰۴ کال په پسرلي کې به د کابل ښار په اړونده ساحو کېنول شي. د زرغونتیا ریاست مرستیال سراج الدین پټان په دې اړه وویل: د کابل ښار د زرغونتیا او سمسورتیا په برخه کې ارزول شوي پلانونه تر لاس لاندې دي چې، یو له هغو څخه د سلګونه زره مرسل او نورو فصلي ګلانو، میوه لرونکو او بې میوې نیالګیو روزنه او پالنه ده، چې د تېر کال په پرته د نباتي بوټو په روزنه او پالنه کې د پام وړ ډېروالی راغلی دی. نوموړي زیاته کړه، دغه بوټي به په مناسبو ځایونو کې په معیاري توګه کېنول شي.اوس مهال د زرغونتیا ریاست کارکوونکي په (۹) قوریو، (۵۰) شنو خونو او (۲۰) ګلخانو کې د نباتي بوټو په ساتنه او پالنه بوخت دي. دغه راز د قرغې بند، تنګي غارو، د خیرخانې د لومړۍ برخې په پارک او کارته سه سیمه کې د (۴) ګلخانو د جوړولو چارې روانې دي. د دې سربېره د زرغونتیاریاست کارکوونکي د ښار په کچه له زرغونو سیمو او پارکونو څخه په دومداره توګه څارنه او ساتنه کوي. دا په داسې حال کې ده چې، د کابل ښاروالۍ زرغونتیا ریاست هر کال د نیالګیو کېنولو په موسم کې د ښار د زرغونتیا او سمسورتیا په موخه، د کابل ښار په بېلابېلو سیمو کې سلګونه زره نیالګي او ګلان کېنوي او له هغو څخه ساتنه او پالنه یې کوي