د څوارلسمې ناحيې مسئولينو د دې ناحیې اړوند د قرغې بند په شاوخوا کې د غصب شويو ځمکو د بېرته راګرځولو په اړه اقدام کړى، چې په پايله کې يې يو شمېر جوړ شوي غير قانوني تاسيسات ويجاړ کړي دي. د څوارلسمې ناحيې د ښاري خدمتونو آمر عبدالحق حقيار په دې اړه وويل: په تېرو کلونو کې يو شمېر غاصبينو او فرصت غوښتونکو په بېلابېلو پلمو د قرغې بند شاوخوا ځمکه کې د ناقانونه تاسيساتو په جوړولو لاس پورې کړی ؤ چې، تر پېژندنې وروسته یې د ویجاړولو په اړه اقدام شوی. نوموړي زياته کړه: تر اوسه (۳۰) جريبه غصب شوې ځمکه بېرته راګرځول شوې او دا لړۍ دوام لري، د غونډیو په لمنو کې له زرغونو سیمو او د قرغې بند سړک په شاوخوا کې ناقانونه غرفې او نور تأسیسات بېرته ویجاړېږي، ځکه د دغو خپلسریو له امله د یادې تفریحي سیمې چاپېریال او طبیعي ښکلا ته زیان رسېدلی دی. کابل ښاروالۍ د غصب شویو ځمکو بېرته راوګرځولو ته ژمنه ده او فرصت غوښتونکو او قانون ماتوونکو ته به اجازه ورنکړي چې له امارتي ځمکو څخه شخصي ګټه پورته کړي.