کابل ښاروال مولوي عبدالرشید د اتمې ناحیې له اداري دفترونو څخه لیدنه وکړه، اود دې ناحیې د مسئولینو کړنې او فعالیتونه یې و ارزول. د دې ارزونو په ترڅ کې هغه کارکوونکي چې په خپلو دندو کې یې ځنډ او غفلت کړی وي، د کابل ښاروالۍ د رهبرۍ له لوري ورسره جدي او قانوني برخورد ترسره کېږي. دغه راز کابل ښاروال په دې وروستیو کې د ښاري خدمتونو د بهیر د چټکتیا په موخه، د پنځمې، شپږمې، اوومې، لسمې، یوولسمې او دولسمې ناحیو د مسئولینو کړنې هم ارزولې دي. نوموړي د چارو د چټکتیا، د غوره ښاري خدمتونو د وړاندې کولو او د وضعیت د ښه والي په موخه، اړوندو مسئولینو ته یو لړ سپارښتنې وکړې. کابل ښاروال په خپلو خبرو کې وويل: د غوره ښاري خدمتونو د وړاندې کولو لپاره زيات کار ته اړتيا ده، مسئولین باید په خپلو دندو کې ځنډ او غفلت ونه کړي، ځکه دا د کابل ښاروالۍ مشرتابه او ښاریانو ته د منلو وړ نه ده. دغه راز کابل ښاروال څرګنده کړه چې، موږ به د مجازاتو او مکافاتو له اصولو سره سم چلند وکړو، د کابل ښاروالۍ کارکوونکي باید د ټولو ښاریانو خدمتګار وي، د دې ادارې له مراجعینو سره ښه چلند وکړي، او د ایماندارۍ او صداقت په ګاڼه سمبال وي. همدا شان نوموړي په جدي توګه مسئولینو سپارښتنه وکړه، چې د ښاري نظم د تأمین، د ښاري خدمتونو د محصول د راټولولو، د غصب شویو ځمکو د بېرته راګرځولو، د تنظیفي او زرغونتیا خدمتونو په ترسره کولو او د ښاري مدیریت اړوند د یو شمېر نورو مسایلو په برخه کې دې ورسپارل شوي دندې او مسئولیتونه په ښه توګه ترسره کړي