کابل ښاروال مولوي عبدالرشید د پنځلسمې ناحیې له اداري دفترونو څخه لیدنه وکړه، اود دې ناحیې د مسئولینو کړنې او فعالیتونه یې و ارزول. کابل ښاروال په خپلو خبرو کې وويل: د غوره ښاري خدمتونو د وړاندې کولو لپاره زيات کار ته اړتيا ده، مسئولین باید په خپلو دندو کې ځنډ او غفلت ونه کړي، ځکه دا د کابل ښاروالۍ مشرتابه او ښاریانو ته د منلو وړ نه ده. دغه راز کابل ښاروال څرګنده کړه چې، موږ به د مجازاتو او مکافاتو له اصولو سره سم چلند وکړو، د کابل ښاروالۍ کارکوونکي باید د ټولو ښاریانو خدمتګار وي، د دې ادارې له مراجعینو سره ښه چلند وکړي، او د ایماندارۍ او صداقت په ګاڼه سمبال وي. همدا شان نوموړي په جدي توګه مسئولینو سپارښتنه وکړه، چې د ښاري نظم د تأمین، د ښاري خدمتونو د محصول د راټولولو، د غصب شویو ځمکو د بېرته راګرځولو، د تنظیفي او زرغونتیا خدمتونو په ترسره کولو او د ښاري مدیریت اړوند د یو شمېر نورو مسایلو په برخه کې دې ورسپارل شوي دندې او مسئولیتونه په ښه توګه ترسره کړي څو د ښاریانو رضایت ترلاسه شي. کابل ښاروال په دې وروستیو کې د بېلابېلو ناحیو د مسئولینو فعالیتونه ارزولي دي، چې د دې ادارې د مشرتابه له پرېکړې وروسته به د ښاري خدمتونو د وضعیت د ښه والي په موخه لازم تصمیمونه ونیول شي.