د پنځلسمې ناحیې د مسؤلینو او د دې ناحیې د ګذر وکیلانو د شورا تر منځ، له سړکونو، پلولارو او زرغونو سیمو څخه د خنډونو د پاکولو ،د ښاري خدمتونو د محصول راټولولو، د غصب شویو ځمکو د بیرته راګرځولو، د ودانیز جواز مطابق د ودانیو جوړولو او د هټیو د لوحو د تنظیم په اړه مشورتي غونډه ترسره شوه. د پنځلسمې ناحیې رئیس انجینر عبیدالله شیرزاد د ګذر وکیلانو له پخوانیو همکاریو څخه د مننې په ترڅ کې؛ د پورتنیو مسایلو په اړه د کابل ښاروالۍ کړنلاره او مقررات د غونډې له ګډون والو سره شریک کړل او ویې ویل: ګذر وکیلان د ښار په غوره مدیریت کې رغنده رول لوبوي، او اړتیا ده چې د ښاري پلانونو او برنامو په پلي کولو کې له کابل ښاروالۍ سره مرسته وکړي. وروسته د یادې ناحیې ګذر وکیلانو د کابل ښاروالۍ له ښاري پلانونو او برنامو څخه د خپل ملاتړ د اعلانولو ترڅنګ، د ښاري ژوند د قانون د حاکمیت او پیاوړتیا په برخه کې د هر ډول مرستې ژمنه وکړه.