د کابل ښاروالۍ د چاپېریالي روغتیا او چاپېریال ساتنې ریاست له خوا په دې وروستیو کې له ښار څخه راټول شوي (۲۷) ټنه بې کیفیته خوراکي او غیر خوراکي توکي چې، د مصرف نېټه یې هم پای ته رسېدلې وه د ټاکل شوي پلاوي په حضور کې د ګزک په سیمه کې له منځه یوړل شول. د چاپېریالي روغتیا او چاپېریال ساتنې ریاست مرستیال مفتي فضل کریم احمد په دې هکله وویل: په دغو توکو کې شیدې، ملايي، بیسکویت، غوړي، پنیر، د لوبیا او نخودو کنسرو، مټر، مرخېړي، د رومي بادنجانو رب، چپس، پاپړ، د څښاک غیر الکولي او د مینځلو مواد شامل دي. نوموړي زیاته کړه چې، د ښاریانو د روغتیا خوندی ساتلوپه موخه، د کابل ښاروالۍ د مسئولینو له لوري په بازارونو کې د خوراکي او غیرخوراکي توکو له نېټې او کیفیت څخه څارنې دوام لري او پلورونکي دې د بې کیفیته او تېروخته توکو له پلورلو څخه په کلکه ډډه وکړي او ښاریانو ته هم پکار ده چې، د خپلو اړتیا وړ توکو د پېرودلو پرمهال د هغوی نېټې او کیفیت ته پام وکړي. د یو بل خبر له مخې، د ودانیو (۱۵۰) ټنه بې کیفیته او تېر وخته رنګ هم په یاده سیمه کې له منځه یوړل شو.