د دولسمې ناحیې اړوند د احمد شاه بابا مېنې د څلورم بلاک او ماموریت څلورلارې تر منځ سیمه کې د یادې ناحیې د نوې اداري ودانۍ د جوړولو چارې چې، څه موده وړاندې پیل شوې وې، تر اوسه (۵۰) سلنه مخته تللې دي. د دغې ودانۍ د جوړولو چارې چې، په (۵۵۰) متر مربع ځمکه او د یوې تکهوۍ په ګډون په (۳) پوړونو کې په اساسي توګه د جوړېدو په حال کې ده ، تر راتلونکو دوه میاشتو پورې به بشپړې شي. د ډېزاین له مخې د یادې ودانۍ په هر پوړ کې اداري دفترونه، د غونډو خونه، دهلیزونه او تنشابونه په پام کې نیول شوي دي، چې په بشپړېدو سره به یې کارکوونکو ته مناسب کاري چاپېریال رامنځته او ښاریانو ته به ګڼې آسانتیاوې رامنځته شي.