د دویمې ناحیې اړوند د فروشګاه په سیمه کې د یوه سوداګریز مارکیټ د جوړولو چارې چې، په روان کال کې د کابل ښاروالۍ له خوا او د خصوصي سکتور په مرسته پیل شوې وې؛ (۸۰) سلنه مخته تللې دي او ټاکل شوې ده تر راتلونکو (۳) میاشتو پورې بشپړې شي. دغه مارکېټ د کابل ښار د اقتصادي ودې په موخه، په (۱۶۴۳) متر مربع ځمکه کې د دوو تهکویو په لرلو سره په (۹) پوړونو کې د جوړېدو په حال کې دی چې، دوه لاندني پوړونه یې د موټرو د پارکینګ او په پورتنیو پوړونو کې یې (۶۷۰) هټۍ په پام کې نیول شوې دي.. دغه راز په یاد مارکېټ کې د لمریزې او ښاري برښنا سربېره، د خوندیتوب مسایل، د اور وژني سیستم، جومات، د سپورټ او نندارتون لپاره ځانګړي ځایونه او د وتلو او ننوتلو دروازې هم په پام کې نیول شوې دي. د یادونې وړ ده چې، د ښار په نورو برخو کې هم د کابل ښاروالۍ د نقشې مطابق د یو شمېر نورو سوداګریزو مارکېټونو د جوړولو چارې روانې دي چې، په دې کار سره له یوې خوا ښاریانو ته کاري بوختیاوې رامنځته شوې او له بل لوري ته د مارکېټونو جوړېدل د کابل ښار په اقتصادي وده کې ځانګړی ارزښت لري.