کابل ښاروال مولوي عبدالرشید د درېیمې ناحیې له اداري دفترونو څخه لیدنه وکړه، اود دې ناحیې د مسئولینو کړنې او فعالیتونه یې له نږدې و څارل. کابل ښاروال په خپلو خبرو کې د چارو په چټکتیا ټینګار وکړ او ویې ویل:«د دندو د کړنلارې مطابق د بېلابېلو څانګو د مسئولینو کړنې او فعایتونه د کابل ښاروالۍ دمشر تابه ترڅارنو لاندې دي، د دندو په ترسره کولو کې ځنډ او غفلت د کابل ښاروالۍ مشرتابه ته د منلو وړ نه ده.» دغه راز کابل ښاروال څرګنده کړه چې، موږ به د مجازاتو او مکافاتو له اصولو سره سم چلند وکړو، د کابل ښاروالۍ کارکوونکي باید د ټولو ښاریانو خدمتګار وي، د دې ادارې له مراجعینو سره ښه چلند وکړي، او د ایماندارۍ او صداقت په ګاڼه سمبال وي. همدا شان نوموړي په جدي توګه مسئولینو سپارښتنه وکړه، چې د ښاري نظم د تأمین، د ښاري خدمتونو د محصول د راټولولو، د غصب شویو ځمکو د بېرته راګرځولو، د تنظیفي او زرغونتیا خدمتونو په ترسره کولو او د ښاري مدیریت اړوند د یو شمېر نورو مسایلو په برخه کې دې ورسپارل شوي دندې او مسئولیتونه په ښه توګه ترسره کړي څو د ښاریانو رضایت ترلاسه شي