د کابل ښاروالۍ د بېلابېلو څانګو کارکوونکو د هڅو له امله، د استوګنې او سوداګریزو مرکزونو د مرکزګرمۍ په سیستم کې د لوګي د تصفیې فلټر نصب او فعالول؛ په بېلابېلو ناحیو کې له سیمه ییزو شوراګانو سره د عامه پوهاوي د غونډو ترسره کول او د ښاریانو په مرسته، اوس په کابل ښار کې د هوا ککړتیا د تېر کال په پرتله تر ډیره کمه شوې ده. د دوو کاري شفتونو (شپه او ورځ) له لارې د کابل ښاروالۍ د چاپیریالي روغتیا او چاپیریال ساتنې ریاست د کارکوونکو له خوا په دوامداره توګه څارنه، د اړوندو ادارو تر منځ همغږي او په ښاري مدیریت کې د ښاریانو ښکیلتیا، په ځانګړې توګه د هوا د ککړتیا د کمولو په برخه کې، لکه د بې کیفیته ډبرو سکرو کم کارول، د پلاستيک، چرمی توکو، د موټرو د ټایرونو او نورو بې کیفیته سون توکو له سوځولو څخه ډډه کول، د هوا د ککړتیا په کمښت کې ګټور تمام شوي دي. د هوا او چاپېریال د ککړتیا د مخنیوي او کمولو په موخه، موږ ټول ګډ مسئولیت لرو او په دې برخه کې باید تل خپله ملي او اخلاقي دنده ترسره کړو.