د روژې مبارکې میاشتې د رارسیدو په مناسبت، د اړوندو مسئولینو له خوا د لسمې ناحیې د بیلابیلو سیمو په بازارونو کې د نرخنامې د تطبیق له څرنګوالي څخه څارنه وشوه او سرغړونکو ته له تادیب سربېره لازمې سپارښتنې وشوې. د لسمې ناحيې د رئیس مولوي نورالوهاب نوري په وينا، د خوراکي توکو په پلورنځيو، سوپر مارکيټونو او قصابیانو کې د اړتیا وړ توکو له پلورلو څخه څارنه وشوه، هغه پلورونکي چې، د کابل ښاروالۍ د نرخنامې مطابق یې عمل کړی ؤ وهڅول شول، او هغه کسانو ته چې سرغړونې یې درلودې، لازمې سپارښتنې وشوې. نوموړي زیاته کړه، د څارنې په بهیر کې فعالیت کوونکو ته ټینګار وشو چې، د چاپېریال پاکوالي، د صنفي جواز درلودولو، او د توکو نیټې او کیفیت ته پام وکړي. ښاغلي نوري له ټولو ښاریانو غوښتنه وکړه چې، له نرخنامې څخه د ګټې اخیستنې د فرهنګ د دودولو په برخه کې دې له مسئولینو سره مرسته وکړي، او ټولو هټیوالو ته له وړاندې خبرداری ورکړل شوی، چې نرخنامه په لید وړ ځای کې نصب کړي.