د ځنګلي ژوند په اړه لس ورځنی علمي ورکشاپ چې، د کابل پوهنتون د وترنرۍ پوهنځي زده کړیالانو ته په کابل ژوبڼ کې جوړ شوی ؤ، د سندونو په ویشلو سره پای ته ورسېد. د کابل ژوبڼ رئیس عزیزګل ثاقب په دې تړاو وویل: د کابل ژوبڼ په هېواد کې یو له زړه راښکونکو علمي، څېړنیزو او تفریحي بنسټونو څخه دی، چې هېوادوالو ته یې د لیدنې ترڅنګ، د وړکتون ماشومانو، د ښوونځيو او مدرسو زده کوونکو او د بېلابېلو پوهنتونونو زده کړیالانو ته د لیدنې، علمي سیر او څېړنیزو موضوعاتو زمینه برابره کړې ده. ښاغلي ثاقب زیاته کړه، ددغه ورکشاپ ګډونوالو ته د کابل ژوبڼ د وترنری آمریت له خوا د حیواناتو، مرغانو، حشراتو او کبانو د ژوند څرنګوالي او اهمیت په اړه هر اړخیز معلومات ورکړل شول. دغه راز د کابل پوهنتون د وترنري پوهنځي مرستیال پوهاند اسدالله حامد د خپلو خبرو په ترڅ کې وويل: ځنګلي ژوند د بيولوژيکي چاپېريال يوه برخه ده چې، ژوندي موجودات په کې ژوند کوي او د چاپېريال د ثبات د دوام لامل کېږي. نوموړي د کابل ژوبڼ له مسئولینو څخه چې، د زده کړیالانو د علمي او عملي مهارتونو د لوړولو په موخه یې د دغه ورکشاپ په جوړولو کې مرسته کړې مننه وکړه، او ويې ویل چې د دا ډول ورکشاپونو جوړول ځانګړی اهمیت لري.