د روژې مبارکې میاشتې د را رسېدو په مناسبت د شپږمې ناحیې د مسئولانو له لوري د یادې ناحیې په بازارونو کې د نرخنامې د تطبیق له څرنګوالي څارنه وشوه او سرغړونکو ته اړینې سپارښتنې وشوې. د شپږمې ناحیې رئیس مولوي عبدالخالق بدر په دې اړه وویل: په هټیو او لویو پلورنځیو کې د لومړنیو خوراکي توکو له بیو او د قصابیو له فعالیت څارنه وشوه، هغه کسان چې، خپل توکي یې د کابل ښاروالۍ د نرخنامې مطابق پلورل وهڅول شول او چا چې، سرغړونې درلودې لازمې سپارښتنې ورته وشوې. نوموړي زیاته کړه چې، د څارنو په لړ کې فعالیت کوونکو ته ټینګار وشو چې، د فعالیت په سیمه کې حفظ الصحې، د صنفي جواز شتون او د توکو نیټې او کیفیت ته په جدي توګه پام وکړي.