د ترکیې د تیکا موسسې د لابراتوار وسایلو په ګډون (۷۷) قلمه تجهیزات او ماشینري د کابل ژوبڼ له روغتیایي کلینیک سره مرسته وکړه. د کابل ښاروالۍ د ښاري خدمتونو مرستیال مولوي محمد خالد سجستاني د ټیکا موسسې له رئیس ښاغلي فضل اکین اردوغان څخه مننه وکړه او ویې ویل: د ټیکا موسسې تل له کابل ښاروالۍ سره مرسته کړې او د کابل ژوبڼ له کلینیک سره شوې مرستې به هېرې نه کړي او دا مرسته په کابل ښار کې د یادې موسسې د دوستانه اړیکو ښکارندویي کوي. بله خوا د تیکا موسسې د دفتر رئیس د افغانانو او ترکانو ترمنځ د اوږدې دوستۍ د څرګندولو په ترڅ کې ژمنه وکړه چې، کابل ژوبڼ ته به د زیاتو تجهیزاتو په چمتو کولو کې نوره مرسته هم وکړي. نوموړي زیاته کړه، څه باندې شل کاله کېږي چې د تیکا موسسه په افغانستان کې فعالیت کوي او په راتلونکي کې به هم دوام وکړي. په پای کې د کابل ژوبڼ رئیس عزیزګل ثاقب پخپلو خبرو کي د مرسته شویو وسایلو پر ورځنۍ استفادې او اهمیت خبرې وکړې.