د نرخونو د کنټرول او له احتکار څخه د مخنیوي کمیسیون له خوا د دیارلسمې ناحیې په بازارونو کې د لومړنیو توکو له نرخونو څارنه وشوه او هغه هټيوال چې، سرغړونه یې درلوده له قانوني چلند سره مخ شول. د کابل ښاروالۍ د مارکېټونو د تنظیم ریاست مرستیال انجنیر عصمت الله انصار وویل چې، له یو شمېر سوداګرو او د خوراکي توکو له واردونکو شرکتونو سره همغږي شوې ترڅو د لومړنیو خوراکي توکو په بیو کې چې، هېڅ محدودیت پرې نشته ټیټوالی راولي. دغه راز یو شمېر پلورونکو ته سپارښتنه وشوه چې، د توکو له احتکار څخه ډډه وکړي، انصاف په پام کې ونیسي ترڅو ښاریان وکولای شي د روژې په مبارکه میاشت کې خپل د اړتیا وړ توکي په ښه کیفیت او مناسب قیمت ترلاسه کړي. په دې وروستیو کې یو ځل بیا د برچي سیمې ټولو هټیوالو ته سپارښتنه شوې ده چې، نرخنامه په لید وړ ځای کې نصب کړي او د هغې مطابق دې خپل توکي وپلوري.