کابل ښاروال مولوي عبدالرشید په داسې حال کې چې، د کابل ښاروالۍ د ودانیزو چارو مرستیال انجنیر عامر زمرک یاسر او د فني او تخنیکي څانګو رئیسانو هم حضور درلود د سړک جوړونې او ودانیزو قراردادي شرکتونو له استازو سره ناسته ترسره کړه. په دې ناسته کې کابل ښاروال د پروژو د کار پر چټکتیا او ښه کیفیت د ټینګار ترڅنګ، قراردادي شرکتونو ته په خطاب کې وویل: د پروژو په چارو کې سرغړونې کابل ښاریانو او د کابل ښاروالۍ مشرتابه ته د منلو وړ نه دي او په جدي توګه به تعقیب شي. که د پروژو په چارو کې هر ډول سرغړونې ولیدل شي، کابل ښاروالۍ به له سرغړونکي قراردادي شرکت سره خپل قرارداد فسخ کړي. دغه راز کابل ښاروال وویل: د ښار په کچه د ټولګتو پروژو چارې باید په پوره ایماندارۍ او امانتدارۍ او له غفلت پرته ترسره شي. قراردادي شرکتونه مکلف دي چې د سړک جوړونې چارې د ډیزاین مطابق په معیاري توګه او په ټاکلي وخت بشپړې کړي او هیڅ چاته اجازه نه ورکول کیږي چې، د ټیټ کیفیت کار په ترسره کولو سره، د بیتالمال سرمایه او فرصتونه ضایع کړي. نوموړي زیاته کړه چې، د کار په بهیر کې د اوبو شیندلو، خوندیتوب او د ودانیزو اضافي توکو د لېږد په برخه کې باید په خپل وخت اقدام وشي. کابل ښاروال دا هم وویل، چې کابل ښاروالۍ د ملي پانګوالو او د کورنیو ودانیزو شرکتونو ملاتړ کوي، په دې شرط چې ودانیزې چارې یې په معیاري ډول وي، ځکه کابل ښاروالۍ د کابل ښار د معیاري ودې او پراختیا لپاره ژمنه ده